‘And, madam, I pray God send us good of thys mater, for as for hys broder Sir John also, I sent ones to hym for it to have mad good the same graunt that I grauntyd yow with hys assent, to them and to ther issu of ther ij. bodyes lawfully comyng, and he dyd not ther in as I desyred hym. And ther for I prey yow pardon me for sendyng on to hym eny more; for, madam, he is my sone, and I can not fynd in my hert to becom a dayly petycyoner of hys, sythe he hathe denyed me onys myn axing. Peraventure he had ben better to have performyd my desyer; and what hys answer was on to me, John Paston can tell yow as well as I. But, madam, ye ar a moder as well as I, wher I prey tak it non other wyse bot well, that I may not do by John Paston, as ye wyll have me to do; for, madam, thow I wold he dyd well, I have to purvey for more of my chylder then hym, of whyche some be of that age, that they can tell me well inow that I dele not evenly with theym to geve John Paston so large, and theym so lytyll; and, madam, for syche grwgys and other causys, I am ryght sory that the graunte is knowyn that I have mad, with ought it myght take effect. And therfor, madam, fro hensforthe I remyght all thyng to yowr dyscressyon, besechyng yow, the rather for my sake, to be my son Johnis good lady; and I prey God preserve yow to Hys plesure, send yow hastyly yowr hele ayen, and my cosyn yowr husbond also, to whom I prey yow that I may hertly be recomandyd, and to my cosyns Margery and Margaret Byllyngforthe.
_‘An other lettyr to me that I may shewe._
‘I gret yow well, and send you Godes blessyng and myn, letyng yow wet that I undyrstand well by my cosyn, Dame Elyzabeth Brewsys lettyr, whyche I sende yow her with, wherby ye may undyrstand the same, that they intend not to performe thos proferys that ye told me they promysyd yow, trustyng that ye told me none other wyse then was promysed yow. Wherfor I charge yow on my blyssyng that ye be well ware how ye bestow your mynd with ought ye have a substance wher upon to leve; for I wold be sory to wet yow myscary; for if ye do, in your defawt looke never aftyr helpe of me. And also I wold be as sory for hyr as for eny gentywoman leveing, in good feythe; wherfor I warne yow, be ware in eny wyse; and look ye be at Mawtby with me as hastyly as ye can, and then I shall tell yow more. And God kepe yow.
