Quibusdam abhinc annis, exercitationibus juvenilibus subito remissis, in vitam sedentariam lapsum. Animo in studia severiora converso, fibre gradatim laxabantur. Inter legendum, et scribendum inclinato corpore in pectus malum, ruebat. Morbo ingruenti affectio scorbutica auxilium tulit. Invasio prima nimium aspernata. Venientibus hostibus non occursum. Cunctando res non restituta. Remedia convenientia stomachus perhorrescebat. Gravescente dyspnoea phlebotomia frustra tentata. Sanguinis missione vis vitae diminuta: fiebat pulsitis debilior, respiratio difficilior. In pejus ruunt omnia. Febris anomala in febriculam continuam mutata. Dyspnoea confirmata. Fibrarum compages soluta. Valetudo penitus eversa.
His agitatus furiis, aeger ad mare provolat: in fluctus se precipitem, dat: periculum factum spem non fefellit: decies iteratum, felix faustumque evasit. Elater novus fibris conciliatur. Febricula fugatur. Acris dyspnoea solvitur. Beneficium dextra ripa partum, sinistra perditum. Superficie corporis, aquae marine frigore et pondere, compressa et contracta, interstitia fibrarum occluduntur: particulis incrementi novis partes abrasas reficientibus, locus non datur. Nutritio corporis, via pristina clausa, qua data porta ruit: in membranam pulmonum, minus firmatam facile fertur, et glandulis per sputum rejicitur.
Hieme pluviosa, regnante dolores renovantur; tametsi tempore sereno equitatio profuit. Aestate morbus vix ullum progrediebatur. Autumno, valetudine plus declinata, thermis Bathoniensibus solatium haud frustra quaesitum. Aqua ista mire medicata, externe aeque ac interne adhibita, malis levamen attulit. Hiems altera, frigida, horrida, diuturna, innocua tamen successit. Vere novo casus atrox diras procellas animo immisit: toto corpore, tota mente tumultuatur. Patria relicta, tristitia, sollecitudo, indignatio, et saevissima recordatio sequuntur. Inimici priores furore inveterato revertuntur. Rediit febris hectica: rediit asthma cum anxietate, tusse et dolore lateris lancinanti.
Desperatis denique rebus, iterum ad mare, veluti ad anceps remedium recurritur. Balneum hoc semper benignum. Dolor statim avolat. Tertio die febris, retrocessit. Immersio quotidiana antemeridiana, ad vices quinquaginta repetita, symptomata graviora subjugavit.-- Manet vero tabes pituitaria: manet temperamentum in catarrhos proclive. Corpus macrescit. Vires delabuntur.