Þæt geoffrode lámb getacnode Cristes slege, seðe unscæððig wæs his Fæder geoffrod for ure alysednysse. Nu is his ðrowung and his ærist ure Easter-tíd, forðan ðe he us alysde fram deofles þeowdome, and ure ehteras beoð besencte þurh þæt halige fulluht, swa swa wæs Pharao mid his leode on ðære Readan sǽ. Þas fiftig daga fram ðam easterlican dæge sind ealle gehalgode to anre mærsunge, and þes dægðerlica dæg is ure Pentecostes, þæt is, se fifteogoða dæg fram ðam Easter-dæge. On ðam ealdan Pentecosten sette God ǽ ðam Israhela folce, and on ðisum dæge com se Halga Gast on fyres hiwe to Godes hirede; forði ealswa þæt lamb getacnode Cristes ðrowunge, swa eac seo ealde ǽ getacnode godspel-bodunge under Godes gife. Þreo tida sind on ðysre worulde: án is seo ðe wæs butan ǽ; oðer is seo ðe wæs under ǽ; seo ðridde is nu æfter Cristes to-cyme. Þeos tíd is gecweden 'under Godes gife.' We ne sind na butan ǽ, ne we ne moton healdan Moyses ǽ lichamlice, ac Godes gifu ús gewissað to his willan, gif we gemyndige beoð Cristes bebodum and ðæra apostola lare.
{ 314} Hit is gereht on ðyssere pistol-rædinge, hu se Halga Gast on ðisum dæge com to ðam geleaffullan heape Cristes hyredes. Lucas se Godspellere awrát on ðære béc 'Actus Apostolorum,' þæt "se halga hyred wæs wunigende ánmodlice on gebedum on anre upflora, æfter Cristes upstige, anbidigende his behates; þa on ðisum dæge, þe is Pentecostes gecweden, com færlice micel sweg of heofonum and gefylde ealle ða upfleringe mid fyre; and wæs æteowed bufon heora ælcum swylce fyrene tungan, and hí wurdon ða ealle gefyllede mid þam Halgum Gaste, and ongunnon to sprecenne mid mislicum gereordum, be ðam þe se Halga Gast him tæhte. Þa wæron gegaderode binnan ðære byrig Hierusalem eawfæste weras of ælcere ðeode ðe under heofonum eardiað; and þa apostoli spræcon to ðæs folces gegaderunge, and heora ælc oncneow his agen gereord."
"Ða wearð seo menigu swiðe ablicged, and mid wundrunge cwædon, La hú, ne sind þas ðe her sprecað Galileisce? And ure ælc gehyrde hu hi spræcon urum gereordum, on ðam ðe we acennede wæron! We gehyrdon hí sprecan Godes mærða mid urum gereordum. La hwæt ðis beon sceole? Þa cwædon ða Iudeiscan mid hospe, Þas men sindon mid muste fordrencte. Þa andwyrde Petrus, Hit is undern-tíd; hu mihte we on ðysre tide beon fordrencte? Ac ðæs witegan cwyde Ioheles is nu gefylled. God cwæð þurh ðæs witegan muð, þæt he wolde his Gast asendan ofer mennisc flæsc; and manna bearn sceolon witigian, and ic sylle mine forebeacn ufan of heofonum, and mine tácna niðer on eorðan. Wite ge soðlice þæt Crist arás of deaðe, and on ure gewitnysse astah to heofonum, and sitt æt his Fæder swiðran, swa swa Dauid be him witegode, þus cweðende, Drihten cwæð to minum Drihtne, Site to minre swiðran, oðþæt ic alecge ðine fynd under þinum fot-scamele. Þa þæt folc ðis gehyrde, ða wurdon hí onbryrde, and cwædon to ðam apostolon, La leof, hwæt is us to donne? Þa andwyrde Petrus, Behreowsiað eowre synna, and underfoð fulluht on Cristes naman, and eowre synna beoð { 316} adylegode, and ge underfoð þone Halgan Gast. Þa underfengon hi his lare, and bugon to fulluhte on ðam dæge ðreo ðusend manna. Þa wæron ealle on annysse mid þam apostolum, and beceapodon heora æhta, and þæt feoh betæhton ðam apostolum, and hi dældon ælcum be his neode."