Se engel grette Marian, and cwæð, þæt heo wære mid Godes gife afylled, and þæt hyre wæs God mid, and heo wæs gebletsod betwux wifum. Soðlice heo wæs mid Godes gife { 198} afylled, forðon ðe hire wæs getiðod þæt heo ðone abǽr þe astealde ealle gifa and ealle soðfæstnyssa. God wæs mid hire, forðan ðe he wæs on hire innoðe belocen, seðe belicð ealne middangeard on his anre handa. And heo wæs gebletsod betwux wifum, forðan ðe heo, butan wiflicre bysnunge, mid wlite hyre mægðhádes, wæs modor þæs Ælmihtigan Godes.
Se engel gehyrte hí mid his wordum, and cwæð hire to, "Efne ðu scealt geeacnian on ðinum innoðe, and þu acenst sunu." Oncnawað nu, þurh þas word, soðne mannan acennedne of mædenlicum lichaman. His nama wæs Hiesus, þæt is Hælend, forðan ðe hé gehælð ealle ða þe on hine rihtlice gelyfað. "Þes bið mǽre, and he bið gecíged Sunu þæs Hexstan." Gelyfað nu, þurh ðas wórd, þæt he is soð God of soðum Gode, and efen-ece his Fæder, of ðam he wæs æfre acenned butan anginne. Crist heold Dauides cynesetl, na lichamlice ac gastlice; forðan ðe he is ealra cyninga Cyning, and rixað ofer his gecorenan menn, ægðer ge ofer Israhela folc ge ofer ealle oðre leodscipas, ða ðe on rihtum geleafan wuniað; and Crist hí ealle gebrincð to his ecan rice. Israhel is gecweden, 'God geseonde,' and Iacob is gecweden, 'Forscrencend.' Nu ða men ðe God geseoð mid heora mode þurh geleafan, and þa ðe leahtras forscrencað, hí belimpað to Godes ríce, þe næfre ne ateorað.
Þa cwæð Maria to ðam engle, "Hú mæg þæt beon þæt ic cild hæbbe, forðan ðe ic nanes weres ne bruce? Ic geteohode min lif on mægðhade to geendigenne: hu mæg hit ðonne gewurðan þæt ic, butan weres gemanan, cennan scyle?" Þa andwyrde se engel ðam mædene, "Se Halga Gast cymð ufen on ðe, and miht ðæs Hyhstan ofersceadewað ðe." Þurh ðæs Halgan Gastes fremminge, swa swa we ær cwædon, wearð Crist acenned on ðære menniscnysse; and Maria his modor wæs ofersceadewed ðurh mihte þæs Halgan Gastes. Hu wæs heo ofersceadewod? Heo wæs swa ofersceadewod þæt heo wæs geclænsod and gescyld wið ealle leahtras, þurh { 200} mihte ðæs Halgan Gastes, and mid heofenlicum gifum gefylled and gehalgod.
Se engel cwæð, "Þæt Halige, þe of ðe bið acenned, bið geciged Godes Sunu." Witodlice ealle menn beoð, swa swa se witega cwæð, mid unrihtwisnysse geeacnode, and mid synnum acennede, ac ure Hælend ana wæs geeacnod butan unrihtwisnysse, and butan synnum acenned; and he wæs halig þærrihte swa hraðe swa hé mann wæs, and fulfremed God, þæs Ælmihtigan Godes Sunu, on anum hade mann and God. Ða cwæð Maria to ðam engle, "Ic eom Godes ðinen; getimige me æfter ðinum worde." Micel eadmodnys wunode on hyre mode, þaþa heo ðus cleopode. Ne cwæð heo na, Ic eom Godes modor, oððe, Ic eom cwen ealles middangeardes, ac cwæð, "Ic eom Godes þinen;" swa swa us mynegað þæt halige gewrit, þus cweðende, "Þonne ðu mære sy, geeadmed þe sylfne on eallum ðingum, and ðu gemetst gife and lean mid Gode." Heo cwæð to ðam engle, "Getimige me æfter ðinum worde:" þæt is, Gewurðe hit swa ðu segst, þæt ðæs Ælmihtigan Godes Sunu becume on minne innoð, and mennisce edwiste of me genime, and to alysednysse middangeardes forðstæppe of mé, swa swa brydguma of his brydbedde.