Eft ðaða se ðrimwealdenda Scyppend mancyn geworhte, þa forgeaf hé Adame and Euan agenne cyre, swa hi, ðurh gehyrsumnysse, á on ecnysse, butan deaðe, on gesælðe wunodon, mid eallum heora ofspringe, swa hi, ðurh ungehyrsumnysse, deadlice wurdon. Ac ðaþa hí Godes bebod forgægdon, and þæs awyrigedan deofles lare gehyrsumodon, þa wurdon hi deadlice, and forscyldegode þurh agenne cyre, hí and eall heora ofspring; and ðeah ðe næfre ne wurde syððan mancynne gemiltsod, ðe má ðe ðam deoflum is, ðeah wære Godes rihtwisnys eallunga untæle. Ac eft seo miccle mildheortnys ures Drihtnes us alysde þurh his menniscnysse, gif we his bebodum mid ealre heortan gehyrsumiað. Witodlice ða ðe nu þurh agenne cyre and deofles tihtinge God forlætað, God forlæt hí eac to ðam ecan forwyrde.
Georne wiste se Ælmihtiga Scyppend, ærðan þe he þa gesceafta gesceope, hwæt toweard wæs. He cuðe gewislice getel ægðer ge gecorenra engla ge gecorenra manna, and eac ðæra modigra gasta and arleasra manna, þe ðurh heora arleasnysse forwurðað; ac he ne forestihte nænne to yfelnysse, forðan þe he sylf is eall gódnyss; ne hé nænne to forwyrde ne gestihte, forðan ðe he is soð líf. He forestihte ða gecorenan to ðam ecan life, forðan ðe he wiste hí swilce towearde, þurh his gife and agene gehyrsumnysse. He nolde forestihtan þa arleasan to his rice, forðan ðe he wiste hí swilce towearde, þurh heora agene forgægednysse and ðwyrnysse. { 114} Healdað þis fæste on eowerum heortum, þæt se Ælmihtiga and se Rihtwisa God nænne mann ne neadað to syngigenne, ac he wát swa-ðeah on ǽr hwilce þurh agenne willan syngian willað. Hwí ne sceal he ðonne rihtlice wrecan þæt yfel þæt he onscunað? He lufað ælc gód and rihtwisnysse, forðan ðe he is gecyndelice gód and rihtwis; and he hatað ealle ða ðe unrihtwisnysse wyrcað, and þa fordeð þe leasunge sprecað. Witodlice þa þe on God belyfað, hi sind þurh ðone Halgan Gást gewissode. Nis seo gecyrrednys to Gode of us sylfum, ac of Godes gife, swa swa se apostol cwyð, "Þurh Godes gife ge sind gehealdene on geleafan."
Þa ðe ne gelyfað ðurh agenne cyre hí scoriað, na ðurh gewyrd, forðan ðe gewyrd nis nan ðing buton leas wena; ne nan ðing soðlice be gewyrde ne gewyrð, ac ealle ðing þurh Godes dom beoð geendebyrde, seðe cwæð þurh his witegan, "Ic afandige manna heortan, and heora lendena, and ælcum sylle æfter his færelde, and æfter his agenre afundennysse." Ne talige nan man his yfelan dæda to Gode, ac talige ærest to þam deofle, þe mancyn beswác, and to Adámes forgægednysse; ac ðeah swiðost to him sylfum, þæt him yfel gelicað, and ne licað gód.