Understandað nu, mine gebroðra, þa micclan lufe þæs eadigan weres. On deaðe hé wæs gesett, and ðeah he bæd mid soðre lufe for his cwelleras; and betwux ðæra stana hryre, ðaða gehwá mihte his leofostan frynd forgytan, ða betæhte hé his fynd Gode, þus cweðende, "Drihten, ne sete þu ðas dæda him to synne." Swiðor he besorgade þa heora synna þonne his agene wunda; swiðor heora arleasnysse þonne his sylfes deað; and rihtlice swiðor, forðan ðe heora arleasnysse fyligde se eca deað, and þæt ece líf fyligde his deaðe. Saulus heold ðæra leasra gewitena reaf, and heora mod to þære stæninge geornlice tihte. Stephanus soðlice gebigedum cneowum Drihten bæd þæt hé Saulum alysde. Wearð ða Stephanes bén fram Gode gehyred, and Saulus wearð alysed. Se árfæsta wæs gehyred, and se arleasa wearð gerihtwisod.
On ðyssere dæde is geswutelod hu micclum fremige þære { 52} soðan lufe gebed. Witodlice næfde Godes gelaðung Paulum to lareowe, gif se halga martyr Stephanus swa ne bæde. Efne nú Paulus blissað mid Stephane on heofenan rice; mid Stephane hé bricð Cristes beorhtnysse, and mid him hé rixað. Þider ðe Stephanus forestóp, mid Saules stanum oftorfod, ðider folgode Paulus gefultumod þurh Stephanes gebedu. Þær nis Paulus gescynd þurh Stephanes slege, ac Stephanus gladað on Paules gefærrædene; forðan þe seo soðe lufu on heora ægðrum blissað. Seo soðe lufu oferwann ðæra Iudeiscra reðnysse on Stephane, and seo ylce lufu oferwreah synna micelnysse on Paule, and heo on heora ægðrum samod geearnode heofenan rice. Eornostlice seo soðe lufu is wylspring and ordfruma ealra godnyssa and æðele trumnys, and se weg þe lǽt to heofonum. Se ðe færð on soðre lufe ne mæg hé dwelian, ne forhtian: heo gewissað, and gescylt, and gelæt. Þurh þa soðan lufe wæs þes halga martyr swa gebyld þæt he bealdlice ðæra Iudeiscra ungeleaffulnysse ðreade, and he órsorh betwux ðam greatum hagolstanum þurhwunode; and he for ðam stænendum welwillende gebæd, and þær to-eacan ða heofenlican healle cucu and gewuldorbeagod inn-ferde.