Ic Ælfric munuc and mæssepreost, swa þeah waccre þonne swilcum hadum gebyrige, wearð asend on Æþelredes dæge cyninges fram Ælfeage biscope, Aðelwoldes æftergengan, to sumum mynstre þe is Cernel gehaten, þurh Æðelmæres bene ðæs þegenes, his gebyrd and goodnys sind gehwær cuþe. Þa bearn me on mode, ic truwige þurh Godes gife, þæt ic ðas boc of Ledenum gereorde to Engliscre spræce awende; na þurh gebylde mycelre lare, ac forþan þe ic geseah and gehyrde mycel gedwyld on manegum Engliscum bocum, þe ungelærede menn þurh heora bilewitnysse to micclum wisdome tealdon; and me ofhreow þæt hí ne cuþon ne næfdon þa godspellican lare on heora gewritum, buton þam mannum anum ðe þæt Leden cuðon, and buton þam bocum ðe Ælfred cyning snoterlice awende of Ledene on Englisc, þa synd to hæbbene. For þisum antimbre ic gedyrstlæhte, on Gode truwiende, þæt ic ðas gesetnysse undergann, and eac forðam þe menn behofiað godre lare swiðost on þisum timan þe is geendung þyssere worulde, and beoð fela frecednyssa on mancynne ærðan þe se ende becume, swa swa ure Drihten on his godspelle cwæð to his leorning-cnihtum, "Ðonne beoð swilce { 4} gedreccednyssa swilce næron næfre ær fram frymðe middangeardes. Manega lease Cristas cumað on minum naman, cweðende, 'Ic eom Crist,' and wyrcað fela tacna and wundra, to bepæcenne mancynn, and eac swylce þa gecorenan men, gif hit gewurþan mæg: and butan se Ælmihtiga God ða dagas gescyrte, eall mennisc forwurde; ac for his gecorenum he gescyrte þa dagas." Gehwá mæg þe eaðelicor ða toweardan costnunge acuman, ðurh Godes fultum, gif hé bið þurh boclice lare getrymmed; forðan ðe þa beoð gehealdene þe oð ende on geleafan þurhwuniað. Fela gedreccednyssa and earfoðnysse becumað on þissere worulde ǽr hire geendunge, and þa synd ða bydelas þæs ecan forwyrdes on yfelum mannum, þe for heora mándædum siððan ecelice þrowiað on ðære sweartan helle. Þonne cymð se Antecrist, se bið mennisc mann and soð deofol, swa swa ure Hælend is soðlice mann and God on anum hade. And se gesewenlica deofol þonne wyrcð ungerima wundra, and cwyð þæt he sylf God beo, and wile neadian mancynn to his gedwylde; ac his tima ne bið na langsum; forþan þe Godes grama hine fordeð, and þeos weoruld bið siððan geendod. Crist ure Drihten gehælde untrume and adlige, and þes deofol þe is gehaten Antecrist, þæt is gereht, ðwyrlic Crist, aleuað and geuntrumað ða halan, and nænne ne gehælð fram untrumnyssum, buton þam anum þe he sylf ær awyrde. He and his gingran awyrdað manna lichaman digellice þurh deofles cræft, and gehælað hí openlice on manna gesihþe; ac hé ne mæg nænne gehælan þe God sylf ær geuntrumode. He neadað þurh yfelnysse þæt men sceolon bugan fram heora Scyppendes geleafan to his leasungum, seðe is ord ælcere leasunge and yfelnysse. Se Ælmihtiga God geðafað þam arleasan Antecriste to wyrcenne tácna, and wundra, and ehtnysse, to feorþan healfan geare; forþan ðe on ðam timan bið swa micel yfelnyss and þwyrnys betwux mancynne þæt hí wel wyrðe beoð þære deoflican ehtnysse, to ecum forwyrde þam ðe him onbugað, and to ecere myrhðe ðam þe him þurh geleafan wiðcweðað. God { 6} geðafað eac þæt his gecorenan þegenas beon aclænsade fram eallum synnum þurh ða ormætan ehtnyssa, swa swa gold bið on fyre afandod. Þa ofslihð se deofol ðe him wiðstandað, and hí þonne farað mid halgum martyrdome to heofenan rice. Þa ðe his leasungum gelyfað, þam hé arað, and hí habbað syððan þa ecan susle to edleane heora gedwyldes. Se arleasa deð þæt fyr cymð ufan swilce of heofonum on manna gesihðe, swilce hé God Ælmihtig sy, ðe ah geweald heofenas and eorþan. Ac þa cristenan sceolon beon þonne gemyndige hu se deofol dyde þa ða he bæd æt Gode þæt he moste fandian Iobes. He gemacode ða þæt fyr come ufan swilce of heofenum, and forbærnde ealle his scep út on felda, and þa hyrdas samod, buton anum þe hit him cyðan sceolde. Ne sende se deofol ða fyr of heofenum, þeah ðe hit ufan come; forðan þe he sylf næs on heofonum, syððan he for his modignysse of-aworpen wæs. Ne eac se wælhreowa Antecrist næfð þa mihte þæt he heofenlic fyr asendan mæge, ðeah þe hé þurh deofles cræft hit swa gehiwige. Bið nu wíslicor þæt gehwa ðis wite and cunne his geleafan, weald hwa ða micclan yrmðe gebidan sceole. Ure Drihten bebead his discipulum þæt hí sceoldon læran and tæcan eallum þeodum ða ðing þe he sylf him tæhte; ac þæra is nu to lyt ðe wile wel tæcan and wel bysnian. Se ylca Drihten clypode þurh his witegan Ezechiel, "Gif þu ne gestentst þone unrihtwisan, and hine ne manast, þæt hé fram his arleasnysse gecyrre and lybbe, þonne swelt se arleasa on his unrihtwisnysse, and ic wille ofgan æt ðe his blod," þæt is his lyre.